Als Großmuatter vom Kasperl werst ja net g’schont, gell, da stehst immer an vorderster Front und muasst jeden Schmarrn mitmacher. Bis di umschaugst, is die erste Blüte dahi und der Lack fangt zum bröseln an, ganz schnell wirkst verbraucht, verschlampt und abgstanden, und wennsd dann net sakrisch aufpasst, kauft dir koa oide Sau mehr dei authentisches Omatum no ab.

Außerdem kimmt jeden Augenblick a neier Trend daher g’saust und verlangt, dass ma eahm als historisch informierte, aber dennerst zeitgemäße Seniorin sofort nachrennt, weil ma ja sonst den Anschluss verliert. Erst muass die Nasenspitzen unbedingt knallrot sei, dann wieder violett und a Woch drauf wieder lebhaft grau. Momentan is so a eitriger Vanillepuddington schwaar ang’sagt. Dem entsprechend waar i zurzeit grad up to date, und eine gepflegte Betagtheit is von meiner Seiten aus bis auf weiteres gesichert. I hoff ja bloß, des bleibt a so bis mir uns wieder sehng. Sonst schaug i richtig oid aus.

In diesem Sinne,

in alter Frische,

Eier Großmuatter.